స్వాప్నికం

ఫణీంద్ర//స్వాప్నికం//03.08.2013

అదో స్వాప్నిక లోకం!

అక్కడ అన్నీ అందాలే

అంతా పచ్చదనమే!

ఒత్తుగా పెరిగిన చెట్లముసుగుల్లో

ఎత్తయిన ఆ కొండలు

గుండెలు ఝల్లుమనిపించే

అగాధాలు ఆ లోయలు

ఆ కొండల మధ్యన చిందులువేస్తూ

నేలపైకి దూకుతున్న ఆ జలపాతాలు

పూల మకరందాలని దొంగిలించి

భద్రంగా తమగదుల్లో దాచుకున్న ఆ తేనెటీగలు

కొమ్మకొమ్మకు ఎగురుతూ

కుహు కుహు రాగాలు తీస్తున్న ఆ పక్షులు

అకాశానికి పరదాలు కప్పిన

దట్తమైన  ఆ  ఆకుల పొదలు

గాలికి రెపరెపలాడే ఆ పరదాల మధ్యనుంచి

చిలిపిగ తొంగిచూసే లేతకిరణాలు..

సెలయేటి నీట మునిగి,

మరింత స్వచ్చమైన ఆ బంగారు కిరణాలు

నా తనువును తట్టి తరం గాలు రేపుతుంటే

హృదయంలో ఏదో పులకింత!ఏదో మెరుపు!!

అప్పుడు కనిపించావు నువ్వు!

సగం మునిగి,సగం మునగక

సెలయేటి నీటికి ఎదురునిలిచిన

ఎన్నో నల్ల రాళ్ళమధ్య

ఓ అందమైన శిలపై

ప్రకృతి చెక్కిన శిల్పంలా.....

                  …..03.08.2013